Mae archwiliad cyhoeddus annibynnol yn tynnu sylw at gyfleoedd ar gyfer gwella gwerth am arian, yn cefnogi llywodraethu da a rheolaeth ariannol, a gall
ddarparu rhybudd cynnar o broblemau sy’n codi. 

Mae’r Cynllun Blynyddol hwn yn disgrifio’r rhaglen archwilio gynhwysfawr y byddwn yn ei chyflawni dros y flwyddyn i ddod i roi’r wybodaeth a’r sicrwydd sydd eu hangen ar y cyhoedd, y Senedd, y rhai sy’n gwneud penderfyniadau a’r dylanwadwyr ynghylch pa mor dda y mae arian cyhoeddus yn cael ei wario.

Bydd 2026-27 yn flwyddyn o newid i Archwilio Cymru, lle gwelwn Adrian yn cwblhau ei dymor wyth mlynedd fel Archwilydd Cyffredinol Cymru. Mae’r Senedd wedi pleidleisio o blaid enwebu Catherine Mealing-Jones fel Archwilydd Cyffredinol nesaf Cymru. Rydym yn llongyfarch Catherine ac yn edrych ymlaen at weithio gyda hi i sicrhau pontio llyfn pan fydd Adrian yn trosglwyddo’r awenau ym mis Gorffennaf.

Y 12 mis nesaf hefyd yw blwyddyn olaf ein strategaeth gorfforaethol bum mlynedd bresennol. Rydym yn falch o’r cynnydd rydyn ni wedi’i wneud dros y pedair blynedd diwethaf tuag at gyflawni ein huchelgeisiau o hogi cyflawniad archwilio a chynyddu ein heffaith a’n gwelededd. Mae rhai cyflawniadau nodedig wedi’u nodi yn y ddogfen hon. 

Mae cyflawni’r blaenoriaethau sy’n weddill yn parhau i fod yn hollbwysig:

• Gweithio’n agos gyda’r sector llywodraeth leol i rannu arfer da a helpu i ailadeiladu proses cyfrifon gynaliadwy ac amserol.
• Byrhau’r amserlen ar gyfer cwblhau gwaith archwilio perfformiad lleol i sicrhau adroddiadau amserol ac effeithiol.
• Meithrin perthnasoedd effeithiol gyda’r Senedd newydd a Llywodraeth Cymru yn dilyn etholiadau’r Senedd ym mis Mai 2026.
• Cynyddu digideiddio archwilio trwy ddefnyddio deallusrwydd artiffisial ac offer eraill sy’n gwella ansawdd, cynhyrchiant ac effeithlonrwydd ein gwaith. 

Ni ellir cyflawni unrhyw un o’n hamcanion ar gyfer archwilio cyhoeddus o ansawdd uchel heb ein staff. Dros y flwyddyn i ddod, byddwn yn parhau i ddarparu cynnig cyflogaeth rhagorol, hyblyg sy’n ategu lles gweithwyr ac amgylchedd gwaith sy’n annog cydweithredu a gwaith o ansawdd uchel.” 

Fel y gwnawn bob blwyddyn, mae’r Bwrdd hefyd wedi adolygu a diweddaru ein fframwaith o ddangosyddion perfformiad allweddol a thargedau cysylltiedig, i sicrhau eu bod yn parhau i fod yn cyd-fynd yn llawn â’n hamcanion ac yn heriol iawn.