Roedd deilliannau yr adroddwyd arnynt ar gyfer Cymru’n gyfanswm o £8.7 miliwn. Mae hyn £1.6 miliwn yn uwch nag yn ymarfer blaenorol y Fenter Twyll Genedlaethol a dyma’r cyfanswm uchaf yr adroddwyd arno dros y pum ymarfer diwethaf.

Ers i’r Fenter Twyll Genedlaethol ddechrau ym 1996, mae cyrff yng Nghymru wedi adrodd ar ddeilliannau cronnus o £65.2 miliwn. Daeth y deilliannau mwyaf yr adroddwyd arnynt o baru data ar gyfer disgowntiau person sengl y dreth gyngor, bathodynnau glas, a rhestrau aros ar gyfer tai.

Dim ond dangosydd yw pariad data, felly mae angen gwaith dilynol cyn bod cyrff yn dod i unrhyw gasgliadau. Gall oedi cyn gwneud gwaith dilynol ar bariadau data leihau effeithiolrwydd yr ymarfer. Gall gweithgarwch sydd o bosibl yn dwyllodrus, ynghyd â thaliadau, disgowntiau, a dyfarniadau anghywir barhau am yn hwy, gan gynyddu colledion a lleihau cyfleoedd i adfer arian.

Canfuom, ar y cyfan, fod cyrff wedi ymgysylltu’n well ag ymarfer diweddaraf y Fenter Twyll Genedlaethol. Fodd bynnag, ceir meysydd i’w gwella o hyd, gan gynnwys mewn perthynas ag amseroldeb gwaith dilynol a sut y cofnodir gweithgarwch a deilliannau. Daeth rhyw £1.1 miliwn o gyfanswm y deilliannau yr adroddwyd arnynt o gywiriadau yn dilyn ein hadolygiad ni ein hunain.

Yn ogystal â helpu i adnabod ac atal colled ariannol, mae’r Fenter Twyll Genedlaethol yn dwyn manteision ehangach. Er enghraifft, dywedodd cyrff cyhoeddus wrth Archwilio Cymru ei bod yn helpu i wella prosesau a rheolaethau mewnol, adnabod anghenion hyfforddiant, ac yn codi proffil gwaith atal a chanfod twyll.

Un o fanteision allweddol ymarfer paru data ar lefel y DU gyfan yw ei fod yn galluogi pariadau rhwng sefydliadau ar draws ffiniau cenedlaethol. Mae data a gyflwynwyd gan gyrff yng Nghymru wedi bod yn gysylltiedig â gwerth £2.1 miliwn o ddeilliannau yr adroddwyd arnynt gan gyrff cyhoeddus mewn rhannau eraill o’r DU hefyd.