Mae gan yr Ymddiriedolaeth gynlluniau uchelgeisiol i wella’r Gwasanaeth Cludo Cleifion Mewn Achosion Nad Ydynt yn Rhai Brys. Mae’r cynlluniau hyn yn cyd-fynd â Gweledigaeth y Dyfodol ac fe’u goleuir gan ddata ar berfformiad. Fodd bynnag, nid yw manteision a deilliannau disgwyliedig wedi’u diffinio eto, nid yw rolau a chyfrifoldebau ar draws partneriaid wedi’u cytuno’n llawn, ac nid yw cynlluniau wedi’u costio na’u blaenoriaethu’n llawn. 

Mae’r Ymddiriedolaeth yn datblygu trefniadau rheoli rhaglen ar gyfer gwelliannau i’r Gwasanaeth Cludo Cleifion Mewn Achosion Nad Ydynt yn Rhai Brys, ond nid yw’r rhain wedi’u sefydlu’n llawn eto. Mae’r Ymddiriedolaeth a’r Cydbwyllgor Comisiynu’n monitro camau gweithredu a pherfformiad, ond nid oes gan yr Ymddiriedolaeth olwg glir eto ar gynnydd yn erbyn deilliannau disgwyliedig Gweledigaeth y Dyfodol ar draws y system yn ei chyfanrwydd. Er mwyn cyflawni’r deilliannau hynny bydd yn rhaid wrth gyflawni cyflymach, ffocws mwy eglur ar fanteision, a chydweithio agosach gyda phartneriaid allweddol. Caiff siwrneiau wedi’u canslo eu hachosi gan ystod o ffactorau, gan gynnwys canslo gan gleifion, ysbytai ac oherwydd diffyg capasiti yn yr Ymddiriedolaeth. 

Mae’r modd y cyflawnir camau gwella allweddol wedi bod yn arafach na’r bwriad mewn rhai meysydd. Er bod perfformiad wedi gwella ar gyfer rhai mathau o siwrneiau, mae pwysau megis galw cynyddol, anghenion mwy cymhleth gan gleifion, canslo, oedi, a materion cyfathrebu yn parhau i effeithio ar brofiad cleifion. Nid yw adroddiadau’n cysylltu camau gwella â cherrig milltir, manteision nac effaith fesuradwy mewn modd cyson. Mae hyn yn ei gwneud hi’n anos asesu a yw newidiadau’n cyflawni’r deilliannau bwriadedig.