Mae’r Bwrdd yn gweithredu’n dda, gyda hynny’n cael ei ategu gan drefniadau llywodraethu da. Mae’r strwythur pwyllgorau newydd yn ymwreiddio’n dda. Mae’r Bwrdd yn ymgysylltu â staff, cleifion a defnyddwyr gwasanaethau ond rhaid iddo wella sut y mae’n monitro ac yn tracio camau gweithredu sy’n deillio o storïau gwrando a dysgu. Er bod y modd y mae’n rheoli risg yn effeithiol fel rheol, mae angen cryfhau trefniadau rheoli perfformiad i fynd i’r afael â heriau parhaus o ran cyrraedd targedau allweddol, yn enwedig mewn gofal brys ac a gynlluniwyd, canser, a diagnosteg. Mae angen i’r Bwrdd Iechyd ganolbwyntio ar gynnal gwelliannau i ansawdd gwasanaethau. Mae angen iddo hefyd ymateb i rai argymhellion archwilio sy’n dal heb eu rhoi ar waith ers peth amser. 
Mae gan y Bwrdd Iechyd strategaeth hirdymor eglur, a Chynllun Tymor Canolig Integredig wedi’i fantoli’n ariannol a gymeradwywyd gan Lywodraeth Cymru. Mae gwaith yn mynd rhagddo hefyd i ddatblygu Cynllun Gwasanaethau Clinigol Strategol, a ategir gan y gwaith modelu ariannol priodol. Fodd bynnag, araf yw’r cynnydd y mae'r Bwrdd Iechyd yn ei wneud gyda’r gwaith hwn, sy’n effeithio ar allu’r Bwrdd i fwrw ymlaen yn gyflym â gwaith i drawsnewid gwasanaethau. Mae cynllunio ariannol yn gryf, ac mae gan y Bwrdd Iechyd hanes da o gyflawni ei gynllun ariannol. Ond bydd bylchau mewn cynlluniau arbedion, ynghyd â risgiau ariannol eraill, yn dal i olygu bod cyrraedd targedau ariannol yn gryn her.