Fe wnaeth ein hadolygiad asesu cynnydd a wnaed gan Fwrdd Iechyd Prifysgol Bae Abertawe o ran gweithredu ein hargymhellion o archwiliad trefniadau llywodraethu ansawdd 2022, ac ystyriodd gynnydd a wnaed gan y Bwrdd Iechyd i adolygu a gweithredu trefniadau corfforaethol i fodloni gofynion y Dyletswyddau o Ansawdd a Gonestrwydd newydd, a throsolwg a chraffu cysylltiedig.

Mae’r Bwrdd Iechyd wedi gwneud cynnydd cryf o ran gweithredu ein hargymhellion o 2022. Mae hyfforddiant rheoli risg wedi gwella, a cheir craffu cryfach ar gofrestrau risg corfforaethol. 

Mae’r Bwrdd Iechyd bellach yn adrodd fel mater o drefn ar ddarpariaeth a chanlyniadau o weithgarwch archwilio clinigol, ac mae adolygiadau o farwolaethau a phrosesau dysgu wedi gwella hefyd. Mae’r Bwrdd Iechyd hefyd wedi adolygu ei adnoddau llywodraethu ansawdd, wedi cryfhau arweinyddiaeth glinigol, ac wedi cynnig mwy o gyfleoedd hyfforddiant ansawdd i staff. 

Fodd bynnag, mae angen i’r Fframwaith Ansawdd a Diogelwch fod yn fwy eglur am drefniadau gweithredu, wedi’i ddiweddaru i adlewyrchu’r strwythur sefydliadol newydd. Hefyd, ceir cyfleoedd o hyd i gryfhau craffu gweithredol ar gofrestrau risg, i ymwreiddio’r fframwaith gwerthoedd ac ymddygiadau ar lefel weithredu ac i wella trefniadau i staff godi pryderon. 

Mae angen atgyfnerthu presenoldeb clinigol mewn grwpiau ansawdd a diogelwch allweddol, ac mae angen i gyfraddau cydymffurfiad adolygiadau arfarnu perfformiad a datblygiad gynyddu hefyd i fodloni targedau. 

Mae’r Bwrdd Iechyd wedi gwneud cynnydd boddhaol o ran ymwreiddio’r dyletswyddau statudol o ansawdd a gonestrwydd. Mae mecanweithiau cynllunio strategol, ymrwymiad arweinyddiaeth, a llywodraethu ar waith. Fodd bynnag, mae angen i waith monitro’r niferoedd sy’n manteisio ar hyfforddiant staff ar y ddyletswydd o onestrwydd wella.