Mae’r Cynllun Cydraddoldeb Strategol hwn yn nodi’r pethau allweddol yr ydym wedi ymrwymo i’w gwneud dros y pedair blynedd nesaf er mwyn helpu i ddileu gwahaniaethu, hyrwyddo cyfle cyfartal a meithrin perthynas dda.

Fe wnaethom gyhoeddi ein Cynllun Cydraddoldeb Strategol blaenorol ym mis Medi 2022, gan nodi’r pethau allweddol yr oeddem yn bwriadu eu gwneud dros y cyfnod 1 Ebrill 2022 i 31 Mawrth 2026 i helpu i gyflawni’r Ddyletswydd
Cydraddoldeb Cyffredinol. Yn y cyfnod hwnnw, gwnaethom gynnydd da wrth gyflwyno rhaglen waith sy’n ein helpu i gyflawni ein dyletswyddau cyfreithiol a chyflawni ein hamcanion cydraddoldeb. Adroddwyd ar y cynnydd a wnaed o ran
cyflawni’r rhaglen waith honno bob blwyddyn yn ein hadroddiadau cydraddoldeb blynyddol. Roedd ein hadroddiad cydraddoldeb ar gyfer 2024-25, a gyhoeddwyd ym mis Hydref 2025, yn tynnu sylw at gamau ystyrlon a pharhaus i ymgorffori cydraddoldeb, amrywiaeth a chynhwysiant ar draws y sefydliad – o recriwtio a chefnogaeth staff, gan gynnwys ystyriaethau cydraddoldeb yn ein gwaith archwilio, hyd at ein hymgysylltu â’r cyhoedd.

Rydym yn falch o’r cynnydd yr ydym wedi ei wneud ond yn cydnabod bod lle i ni wella o hyd. Felly, rydym wedi datblygu cyfres ddiwygiedig o dri amcan cydraddoldeb a chredwn y bydd yn ein helpu i gyflawni’r Ddyletswydd Cydraddoldeb Cyffredinol yn well dros y pedair blynedd nesaf.

Nid ydym wedi datblygu’r amcanion hyn ar wahân. Tua diwedd 2025, fe wnaethom ddatblygu cynigion cychwynnol ar gyfer beth ddylai ein hamcanion cydraddoldeb diwygiedig fod, ar ôl adolygu effeithiolrwydd y camau a gymerwyd a’r cynnydd a wnaed tuag at gyflawni’r amcanion blaenorol. Yna fe wnaethom gynnal ymgynghoriad cyhoeddus ar ein cynigion rhwng 8 Rhagfyr 2025 a 30 Ionawr 2026. Cyhoeddwyd yr Ymgynghoriad ar ein gwefan, ei hyrwyddo drwy’r cyfryngau cymdeithasol a’i gylchredeg yn uniongyrchol i ystod eang
o randdeiliaid, gan gynnwys y rhai sy’n cynrychioli unigolion â nodweddion gwarchodedig. Ystyriwyd yr holl ymatebion i’r ymgynghoriad yn ofalus wrth gwblhau cynnwys y Cynllun hwn.

Edrychwn ymlaen at weithio ar y cyd â chydweithwyr y tu mewn a’r tu allan i’r sefydliad i wireddu’r weledigaeth a’r amcanion a nodir yn y strategaeth hon.