Mae ffocws allweddol ein hadolygiad wedi bod ar ystyried a yw ymagwedd y Bwrdd Iechyd at gynllunio’r gweithlu’n ei helpu i ymdrin yn effeithiol â heriau o ran gweithlu’r GIG yn awr ac yn y dyfodol.
Yn benodol, fe wnaethom fwrw golwg ar ymagwedd strategol y Bwrdd Iechyd at gynllunio’r gweithlu, camau gweithredol i reoli heriau o ran y gweithlu yn awr ac yn y dyfodol, a threfniadau monitro a goruchwylio.
Mae trefniadau gweithredol i reoli’r gweithlu, megis cylchrestru dyletswyddau staff/nyrsys a chynllunio swyddi meddygon ymgynghorol y tu hwnt i gwmpas yr adolygiad hwn.

Ar y cyfan, canfuom fod gan y Bwrdd Iechyd set glir o flaenoriaethau o ran y gweithlu yn seiliedig ar ddealltwriaeth dda am ei risgiau sylweddol.
Mae’n gweithio’n galed i fynd i’r afael â’i heriau uniongyrchol o ran y gweithlu ac mae ei gamau gweithredu allweddol yn cyd-fynd yn briodol â’r Cynllun Pobl a gytunwyd ganddo.
Fodd bynnag, mae’r ymagwedd yn gorbwysleisio’r atebion byrdymor a gweithredol.
Mae angen amlwg i ailedrych ar gynlluniau gweithredu Dyfodol Clinigol fel eu bod yn ei gwneud yn bosibl datblygu modelau’r gweithlu ar gyfer gwasanaethau sy’n fforddiadwy yn ariannol, yn effeithlon ac yn gynaliadwy.