IGDC sy’n arwain gwaith digidol ar ran GIG Cymru, gan ganolbwyntio ar systemau a rhaglenni cenedlaethol. Fodd bynnag, mae ei Strategaeth Sefydliadol yn rhoi llai o sylw i’w anghenion digidol mewnol ei hun. Mae ei Gynllun Tymor Canolig Integredig (CTCI) yn cynnig mwy o fanylder ynghylch gwelliannau mewnol ond nid yw’n esbonio’n glir beth yw’r manteision na’r deilliannau a ddisgwylir.

Mae’r Bwrdd yn cael adroddiadau rheolaidd, ond mae’r rhain yn cwmpasu rhaglenni cenedlaethol yn bennaf. Mae goruchwyliaeth ar drawsnewid digidol mewnol yn wannach. Golyga hyn nad yw’r Bwrdd yn gallu tracio cynnydd, costau a manteision yn fanwl. O ganlyniad, mae ganddo lai o hyder bod buddsoddiadau mewnol yn darparu gwerth.

Mae IGDC yn cefnogi gwaith ar seiberddiogelwch a thechnolegau datblygol fel deallusrwydd artiffisial. Fodd bynnag, mae adroddiadau’n canolbwyntio’n bennaf ar risgiau ar draws GIG Cymru i gyd, gyda llai o sylw i seilwaith a risgiau seiber IGDC ei hun. O ganlyniad, mae’n anos adnabod a rheoli risgiau mewnol.

Mae IGDC yn bwriadu cryfhau sgiliau digidol ei weithlu, ond mae ei ddull yn dal i ddatblygu. Mae wedi gwneud cynnydd o ran asesu gallu’r gweithlu, ond mae hyn wedi bod yn arafach nag a fwriadwyd. O ganlyniad, mae IGDC yn dal i beidio â deall yr holl fylchau allweddol mewn sgiliau nac ymdrin â hwy yn llawn, a allai effeithio ar ei allu i gyflawni trawsnewid digidol yn effeithiol.

Mae ansicrwydd ariannol yn gwneud trawsnewid digidol mewnol yn anos. Mae’r rhan fwyaf o gyllid yn fyrdymor ac yn canolbwyntio ar systemau cenedlaethol, sy’n lleihau hyblygrwydd ar gyfer buddsoddi mewnol. Nid yw adroddiadau ariannol yn gwahaniaethu’n glir rhwng gwariant mewnol a chenedlaethol, gan gyfyngu ar dryloywder a sicrwydd.