Mae gan y Cyngor sylfeini cryfion ar gyfer mynd i’r afael â thwyll. Mae’n gosod safbwynt eglur o ddim goddefgarwch, mae ganddo strategaeth wedi’i diffinio’n glir, ac mae’n defnyddio staff medrus. Mae ganddo drefniadau cynhwysfawr i adnabod risgiau o dwyll, ymchwilio i achosion, ac i danategu sut y mae’n gweithio gyda phartneriaid. Fodd bynnag, mae gan y Cyngor fwy o ffocws ar ymchwiliadau i dwyll nag ar waith ataliol wedi’i gynllunio. Nid yw’r Cyngor wastad yn gwneud y gorau o’i arbenigedd gwrth-dwyll pan ddatblygir polisïau neu systemau newydd. Gallai hefyd egluro a chryfhau ei ddull o roi cyhoeddusrwydd i achosion o dwyll a brofwyd. Byddai cysylltiadau mwy eglur rhwng risgiau o dwyll, gwaith atal a goruchwyliaeth gan y Pwyllgor Llywodraethu ac Archwilio hefyd yn helpu i gryfhau sicrwydd a hybu safbwynt dim goddefgarwch y Cyngor.