Mae perfformiad y Cyngor o ran darparu addasiadau tai wedi bod yn bryder am nifer o flynyddoedd. Rydym yn cydnabod bod y Cyngor wedi gwneud newidiadau i’r gwasanaeth ers ein hadroddiad yn 2018 ac y cyflwynwyd adroddiadau rheolaidd i’r Aelodau. Fodd bynnag, ac eithrio gwelliant bach mewn dau fath o addasiadau ar gyfer 2025-26 mae perfformiad yn dal i ddirywio. Mae trigolion Pen-y-bont ar Ogwr bellach yn aros am dros ddwy flynedd ar gyfartaledd am addasiad. 

Er ei fod wedi cynyddu ei gyllideb gyfalaf yn ddiweddar, ar adeg ein gwaith maes ni, nid oedd gan y Cyngor gynllun eglur i ymdrin â’i berfformiad. Mae gwendidau mewn cynllunio strategol a darparu adnoddau, dysgu a gwerthuso, a diffyg cydgysylltu rhwng staff ar wahanol gamau’r broses yn effeithio ar effeithiolrwydd y gwasanaeth. Yn seiliedig ar hanes y Cyngor yn y maes hwn a’r cynnydd hyd yma o ran darparu addasiadau tai, nid oes gennym hyder yng ngallu’r Cyngor i ymdrin yn gyflym â hyn. Ers ein gwaith maes, mae’r Cyngor yn datblygu cynllun i ymdrin â’n canfyddiadau.

Rydym wedi crynhoi’r prif gryfderau a meysydd ar gyfer gwella isod:

Cryfderau 

• Mae gan y Cyngor un pwynt cyswllt ar gyfer ymgeiswyr. 

• Mae’r Cyngor yn monitro perfformiad ar gyfer amseroldeb a’r gost ar y cyfan. 

• Mae gan y Cyngor reolaethau sicrhau ansawdd a chymeradwyo. 

• Mae’r Cyngor wedi gwella ei system TG. 

• Mae’r Cyngor wedi cyflwyno fframwaith contractwyr. 

Meysydd ar gyfer gwella 

• Mae amser darparu’r Cyngor yn gwaethygu ac ar hyn o bryd mae’n cymryd dwy flynedd i ddarparu addasiad ar gyfartaledd. 

• Nid yw’r Cyngor yn deall y galw am addasiadau yn y tymor canolig a hir. 

• Nid oes gan y Cyngor wybodaeth gyfoes ar-lein i helpu defnyddwyr y gwasanaeth i ddeall y broses. 

• Nid yw’r Cyngor yn ymgysylltu â grwpiau rhanbarthol i ddeall sut y mae materion yn cymharu ac i ddysgu o’u profiadau. 

• Nid oes gan y Cyngor rhyw lawer o ddealltwriaeth pa un a yw’n cyflawni gwerth am arian.