Mae’r Bwrdd Iechyd wedi gwneud peth cynnydd ers ein hadolygiad dilynol diwethaf, ond mae nifer o faterion hirsefydlog yn dal i fodoli.

Mae sefydlogrwydd y gweithlu yn y Tîm Codio Clinigol wedi gwella gyda chymorth trefniadau rheoli mwy eglur a chyfleoedd datblygu staff. Mae staff hefyd yn dweud bod diwylliant tîm cefnogol yn bodoli. Fodd bynnag, mae nifer sylweddol o uwch swyddi’n dal i fod yn wag, ac mae gweithgareddau allweddol megis dilysu, archwilio a hyfforddiant yn dal i ddibynnu ar nifer fach o unigolion. Mae’r Llawlyfr Polisi a Gweithdrefn Codio Clinigol wedi dyddio ac nid yw’n adlewyrchu trefniadau gweithrediadol cyfredol mwyach.

Mae cofnodion meddygol yn dal i fod yn rhwystr mawr i godio clinigol amserol a chywir. Er bod y defnydd o gofnodion dros dro wedi lleihau a bod mynediad wedi gwella mewn rhai meysydd, mae problemau’n dal i fodoli gydag ansawdd cofnodion, oedi cyn coladu, tracio anghyson a dibyniaeth barhaus ar gofnodion papur.

Mae ymwybyddiaeth y Bwrdd o godio clinigol wedi cael ei chynnal ac fe geir ymrwymiad i wella. Fodd bynnag, cyfyngedig yw’r oruchwyliaeth gydag adroddiadau’n cynnwys ffocws cul ar dargedau Llywodraeth Cymru. Nid oes rhyw lawer o esboniad o’r defnydd o ddata wedi’i godio ac mae goruchwyliaeth gan bwyllgorau’n aneglur. Er bod amlygrwydd y Tîm Codio Clinigol wedi gwella, cyfyngedig yw ymgysylltiad clinigol o hyd.

Nid yw perfformiad y Bwrdd Iechyd yn erbyn mesurau a thargedau codio clinigol Llywodraeth Cymru wedi dangos gwelliant parhaus ac mae’n dal i amrywio dros amser. Er bod ystod o gamau gweithredu’n mynd rhagddynt, nid oes cynllun eglur, cydgysylltiedig i lywio a chynnal gwelliant hirdymor.