Mae’r Bwrdd a’i bwyllgorau’n rhedeg yn effeithiol ac yn dryloyw. Mae cyfarfodydd yn cael eu rheoli’n dda, ac mae gwybodaeth yn dal i fod o safon dda. Ceir ymrwymiad parhaus o hyd i glywed gan gleifion a defnyddwyr gwasanaethau ac mae sesiynau crwydro’r Bwrdd wedi datblygu’n gadarnhaol. Fodd bynnag, gallai’r Bwrdd Iechyd wneud mwy i sicrhau bod y lefel o graffu mewn cyfarfodydd yn dal i fod o safon sy’n gyson yn uchel i ymdrin â’r heriau y mae’r Bwrdd Iechyd yn eu hwynebu.
Mae adroddiadau ar berfformiad yn dal i fod yn dda ac mae trefniadau uwchgyfeirio wedi gweithio’n dda i wasanaethau sydd wedi bod yn ddarostyngedig iddynt. Mae cynhyrchu cynlluniau a strategaethau’n dal i fod yn ymdrech ar y cyd a cheir tystiolaeth bod y Bwrdd Iechyd yn mapio trefniadau gweithio mewn partneriaeth yn fwy effeithiol. Fodd bynnag, byddai o fudd i’r Bwrdd Iechyd sicrhau bod yr Adroddiad Ansawdd Integredig yn cyflwyno naratif cliriach a sicrhau mwy o eglurder ynghylch y cysylltiadau rhwng cynlluniau corfforaethol. Er bod y Bwrdd Iechyd wedi datblygu ei broses rheoli risgiau yn ddiweddar, byddai o fudd adolygu’r trefniadau cyfredol o ran cofrestrau risgiau i sicrhau y gwahaniaethir yn fwy eglur rhwng risgiau strategol a gweithrediadol.
ae sefyllfa ariannol y Bwrdd Iechyd yn dal i achosi pryder. Rhagwelir diffyg sylweddol ar ddiwedd y flwyddyn 2025-26 ac mae cyflawni cynllun arbedion cyfredol y Bwrdd Iechyd yn dal i fod yn her. Nid oedd y Bwrdd na Llywodraeth Cymru yn gallu cymeradwyo Cynllun Blynyddol y Bwrdd Iechyd oherwydd y sefyllfa ariannol. Mae’r Bwrdd Iechyd yn dal i fod â dealltwriaeth dda am ei bwysau o ran costau ond effeithir ar y newid i fodel gwasanaeth mwy fforddiadwy gan oedi wrth roi’r model trawsnewid ‘Gwell Gyda’n Gilydd’ ar waith oherwydd cymhlethdod a chapasiti o ran adnoddau.