Er bod gan y Cyngor Strategaeth Llyfrgelloedd newydd, rydym wedi canfod rhai diffygion yn ei datblygiad. Cyfyngedig fu’r ymgysylltu â staff a chymunedau. Hefyd, nid oes gan y Cyngor gynllun cyflawni sy’n nodi sut y bydd yn gweithredu ac yn monitro’r strategaeth. Mae hyn yn hollbwysig o ystyried yr heriau ariannol tymor canolig sy’n wynebu’r Cyngor. Mae perfformiad yn erbyn Safonau Llyfrgelloedd Cyhoeddus Cymru wedi gwella, ond mae adroddiad Safonau Llyfrgelloedd Cyhoeddus Cymru 2024- 25 yn parhau i godi pryderon ynghylch lefelau staffio, oriau agor ac effaith ar ddefnyddwyr gwasanaethau. Mae’n dod i’r casgliad y bydd hi’n cymryd nifer o flynyddoedd i’r gwasanaeth ddod dros yr heriau y mae wedi’u hwynebu. Mae’r Cyngor wedi canolbwyntio ar gefnogi staff wrth ddod â’r gwasanaeth yn ôl dan reolaeth y Cyngor, a gellir deall hynny. Roedd agwedd staff ynglŷn â’r gefnogaeth hon yn gadarnhaol. Rydym yn cydnabod bod y Cyngor yng nghamau cynnar ei waith i ganlyn arni â’i strategaeth. Rydym wedi datblygu argymhellion sydd wedi’u bwriadu i helpu’r Cyngor i gryfhau ei drefniadau i roi cymorth i ddarparu’r gwasanaeth. Byddwn am weld y Cyngor yn bwrw ymlaen â’r rhain dros y 6-12 mis nesaf i roi mwy o hyder i ni bod ganddo drefniadau ar gyfer sicrhau darbodaeth, effeithlonrwydd ac effeithiolrwydd o ran sut y mae’n defnyddio adnoddau.