Bu llawer iawn o ddiddordeb mewn Cyfarpar Diogelu Personol ers dechrau'r pandemig ac rydym wrthi'n cynnal adolygiad o’r broses o gaffael a chyflenwi cyfarpar diogelu personol yng Nghymru.

Rydym wedi ysgrifennu llythyr at Gadeirydd y Pwyllgor Iechyd, Gofal Cymdeithasol a Chwaraeon a Chadeirydd y Pwyllgor Cyfrifon Cyhoeddus yn esbonio ein gwaith. Rydym wedi rhannu rhai canfyddiadau sydd wedi codi yn ystod ein gwaith maes, ynghylch y gwariant ar gyfarpar diogelu personol a’r modd o’i ddosbarthu, y dull o gontractio, a’r trefniadau ar gyfer ei wirio a’i gymeradwyo.

Gwnaeth y Pwyllgor Iechyd, Gofal Cymdeithasol a Chwaraeon (HSCS) sylwadau ar y cyflenwad o gyfarpar diogelu personol yn ei adroddiad ym mis Gorffennaf 2020 [PDF yn agor mewn ffenest newydd]. Cafodd y Pwyllgor Cyfrifon Cyhoeddus dystiolaeth am gaffael cyfarpar diogelu personol ym mis Medi 2020 yn rhan o'i ymchwiliad i gaffael cyhoeddus. Ac yn fwy diweddar, mae diddordeb wedi'i ddwysau drwy gyhoeddi dau adroddiad gan y Swyddfa Archwilio Genedlaethol. Roedd y cyntaf o’r rhain yn ystyried caffael gan Lywodraeth y DU [yn agor mewn ffenest newydd] ac roedd yr ail yn ystyried yn fwy eang y cyflenwad o gyfarpar diogelu personol yn Lloegr [yn agor mewn ffenest newydd].

Mae ein gwaith ni yn cwmpasu'r un meysydd â'r Swyddfa Archwilio Genedlaethol – caffael a chyflenwi cyfarpar diogelu personol ar gyfer pob gwasanaeth cyhoeddus yng Nghymru, gan ganolbwyntio'n benodol ar y GIG a gofal cymdeithasol. 

Mae ein gwaith maes hyd yma wedi canolbwyntio ar gaffael cyfarpar diogelu personol. Mae gennym waith i'w wneud o hyd i gwblhau ein barn ar gaffael a chyflenwi, yn benodol i staff rheng flaen.

Rydym yn bwriadu cwblhau ein gwaith a chyhoeddi ein canfyddiadau llawn yn y gwanwyn.